rezultaty konferencije - conference results - konferencaj rezultoj

Sbornik iz konferencije jest specijalno izdanje časopisa SLOVJANI.info, Nr. 1, Vol. 3, 2018, ISSN 2570-7108 (print), ISSN 2570-7116 (on-line), ktory jest indeksovany v medžunarodnoj naučnoj bibliotekě CEEOL, Frankfurt am Main, Němcija.

Vtoro lěto konferencije CISLa (Conference on Interslavic Language) o medžuslovjanskom jezyku bylo od 31.5.2018 do 1.6.2018 v gradah Staré Město i Hodonín. CISLa jest medžunarodno zasědanje ljudij, ktori uže mnogo lět sorabotajut na Internetu. Cěljem CISLa jest otvoriti prostor do besědy na izraženja inovativnyh mněnj do medžunarodnoj komunikacije slovjanskyh narodov v uslovjah modernogo globalnogo světa. Na konferenciji jesmo besědovali slědujuče prědměty: Jezyčne problemy v gradžanskoj participaciji, e-demokraciju, prěvod znalostij, komunikacijne udobnomožnosti do specifičnyh oblastij ekonomije različnyh držav, kako jest turistika i digitalna ekonomija, i možnosti koriščenja skonstruovanyh jezykov dlja pobudženja razvitja evropskoj kulturnoj identičnosti i solidarity.

Organizatorom konferencije bylo družstvo Slovjanska unija v Čehiji. Slovjanska unija naleži do najstarših slovjanskyh družstv Češskoj republiky. Družstvo bylo osnovano lětom 1992 i svoju tradiciju vede od Prvogo slovjanskogo sjezda lětom 1848 v Pragě, na ktorom učestvovali znajeme lica medžunarodnogo slovjanskogo dviženja i ktoromu prědsědal otec češskogo naroda František Palacký. Slovjanska unija jest dobrovoljno i nepolitično zapisano družstvo sodrživajuče svojih členov na bazě obščego interesa. Družstvo jest samostojno juridično lico IČ 481 33 396, ktoro jest aktivno na teritoriji Češskoj republiky pod češskym i evropskym zakonodateljstvom. U kulturnoj agentury Evropskoj komisije EACEA jest registrovano pod partnerskym kodom 923564549 i jest kontaktnym licem dlja Češskoj republiky u Medžunarodnoj ustanovy Forum slovjanskyh kultur sědečej v gradu Ljubljana, Slovenija. Forum slovjanskyh kultur jest najbolša slovjanska medžunarodna organizacija s uzkymi vezami do UNESCO i ICOM i do vlad slovjanskyh držav.

Konferencija CISLa 2018 byla čestju 5-ogo medžunarodnogo festivala DNI SLOVJANSKOJ KULTURY, ktory byl naměrjeny na srbsku i lužičsku kulturu i byl posvečeny pameti 1150 lět, kogda slovjansky jezyk i slovjanska literatura byli v Rimu lěta 868 potvrdžene kako četvrty oficialny jezyk Evropskoj hristijanskoj civilizacije. V širšem kontekstu jest 2018 god Evropskogo kulturnogo naslědstva UNESCO.

Druge pametne daty konferencije CISLa 2018 byli:

Na konferenciji bylo 67 učestnikov iz 16 krajin světa: Bosnije, Bulgarije, Čehije, Hrvatije, Italije, Kitaja, Madjarije, Němcije, Niderlandov, Poljsky, Rosije, Slovakije, Slovenije, Sojedinjenyh Štatov Ameriky, Srbije i Ukrajiny. Najstarši učestnik konferencije byl gospodin inženjer František Reichel iz družstva Matica Čehije, Moravy i Silezije. Najmladši učestniki konferencije byli gimnazialni studenti iz medžunarodnogo projekta Ambasada slovjanskoj mladeži.

Čestni prědsědniki konferencije byli Dr. Mateja JANČAR i Prof. Jov TELMISSKY. Jegova Eminencija vladyka Jov jest arhiepiskopom Ekumeničnogo patriarhata v Carigradu i jest direktorom permanentnoj misije Ekumeničnogo patriarhata u Vsesvětnogo sověta crkv v gradu Ženeva, Švejcarija. Dr. Jančar jest menedžerka projektov medžunarodnoj organizacije Forum slovjanskyh kultur v gradu Ljubljana, Slovenija. Konferenciju posětila Jejina Ekscelencija g-ža Vera MAVRIĆ, veleposlanica republiky Srbija v Pragě.

Na konferenciji kromě drugyh govorili i besědovali:

Na obrednom zaključenju v teatralnom salu Muzeja T. G. Masaryka v gradu Hodonín bylo 12 učestnikov nagradženo ordenom KONSTANTINA FILOZOFA za svoj vklad do slovjanskoj kultury. Jan van Steenbergen i Vojtěch Merunka byli nagradženi medalju ŽIVO SLOVO na pamet 200-lětnogo jubileja filozofa, pedagoga i lingvista Alekseja Andrejeviča Hovanskogo i medalju na pamet 75 lět od mučeničskoj smrti svetogo GORAZDA - obnovitelja češsko-slovačskogo Pravoslavja.

Konferencija iměla bogaty kulturny program. Prvy den konferencije byl otvorjen na ratuši grada Staré Město, kde se učestniki konferencije strětli s městnym rukovodstvom i zastupnikami Zlinskogo regiona. Vtory den konferencije byl otvorjen na ratuši grada Hodonín, kde se učestniki konferencije takože strětli s městnym rukovodstvom i zastupnikami Južnomoravskogo regiona. Učestniki konferencije byli od městnyh politikov i kulturnyh i crkovnyh partnerov privitani s velikym interesom do temy medžuslovjanskoj besědy i slovjanskoj kulturnoj diplomacije.

Poslě konferencije prodolžal se program festivala. Vkupě s folklornymi sborami bylo čislo aktivnyh učestnikov festivala približno 120 ljudij i 500 domašnjih posětiteljev.

Učestniki konferencije mogli viděti arheoskansen Modrá s rekonstrukcijami budynkov, hrama, palaca i školy iz vrěmene Velikoj Moravy. V sobotu 2.6. jesmo posětili hram sv. Margity iz 9-ogo stolětja, sělo Lužice i arheopark Mikulčice, večer bylo ceremonijalne otvorjenje vystavky Miroslavova evangelja v Muzeju Biblije Velehrad. V nedělju 3.6. byla slovjanska liturgija v monastyru Hrubá Vrbka, ktory jest takože muzejem i rodnym domom obnovitelja češsko-slovačskogo Pravoslavja i češskogo narodnogo heroja Gorazda. Festival iměl interes i podpor od městnyh medij i takože od državnoj Češskoj televizije i Regionalnoj televizije.

Vsi češski politiki iměli iskreny interes i dobro porazuměnje do temy konferencije kako modernogo medžuslovjanskogo kulturnogo dialoga. Veliky interes i podporu konferenciji dali češska rimsko-katoličska crkva - najmě crkovna občina Velehrad, i češska pravoslavna crkva, najmě Jegova Eminencija vikarny episkop moravsky vladyka Isaias.

rezultaty konferencije CISLa 2018

medžunarodny festival DNI SLOVJANSKOJ KULTURY

Festival DNI SLOVJANSKOJ KULTURY vozniknul v godu 2013 prědvsim iz novoj potrěby postupnogo poznanja historičnyh i glavno kulturnyh korenev vsih slovjanskyh držav, narodov i narodnostij, i to v atraktivnoj formě boljšego, medžunarodnogo sobytja. Do togo vrěmene ne bylo možno uspěti v navezanju historičnoj tradicije prirodnogo sorabotanja kultur slovjanskyh narodov i osnovanja takože boljših kulturnyh projektov. Neoddělimoju čestju medžunarodnogo festivala Dni slovjanskoj kultury jest konferencija CISLa.

Pozitivne rezultaty prědhodnyh lět festivala i zaščity znajemyh osobnostij i institucij sotvorili sut važnu osnovu dlja uspěšnogo prodolžanja festivala i napolnjanja jego GLAVNYH STRATEGIČNYH CĚLJEV:

  1. OTVORJENJE PROSTORA DLJA PREZENTACIJE KULTURNOGO NASLĚDSTVA SLOVJANSKOJ KULTURY
    Festival se odbyl uže tri razy i postupno nahodi ne toliko stabilnějše město odbyvanja, no takože jasnějšu programovu strukturu i zaščitu znajemyh državnyh i medžunarodnyh institucij, ktora pomagaje v budovanju prestižnogo prostora do prezentacije kulturnogo naslědstva postupno vsih slovjanskyh narodov i narodnostij.

  2. ATRAKTIVNO WEEKENDOVO SOBYTJE S TURISTIČNYM POTENCIALOM I PROPAGACIJA NASLĚDSTVA VELIKOJ MORAVY
    Mnogožanrovo sobytje se odbyvaje vyše dnjev, no glavne velike atraktivne akcije se odbudut črěz weekend, i zato mogut v slučaju dobroj propagacije zainteresovati i mnogo posětiteljev iz drugyh gradov i regionov. Kromě togo sobytje prědlagaje program dlja vsih grup zainteresovanyh. Sobytje prirodno poddrživaje takože města sovezane s naslědstvom Velikoj Moravy.

  3. AKTIVNA SORABOTA S ČRĚZGRANIČNYMI INSTITUCIJAMI I OSOBNOSTJAMI S NADOBYČAJNYMI ZAŠČITAMI
    Sobytje organizujemo v sorabotě s sootvětstvujučimi uredami i kulturnymi centrami prezentovanyh slovjanskyh držav, no takože s drugymi medžunarodnymi institucijami… Tuta sorabota se odbyvaje pod zaščitoju najvyše znajemyh domašnjih institucij i osobnostij, kako napriměr prezident republiky, prědsědniki parlamenta, ministerstva češskoj vlady, ambasady, ministerstva i družstva prezentovanyh slovjanskyh držav.

  4. SORABOTA S LOKALNYMI AKTIVITETAMI I VAŽNYMI INSTITUCIJAMI
    Festival se odbyvaje v blizkoj sorabotě s lokalnymi važnymi kulturnymi institucijami (Slovacko muzeum, kino Hvězda, Park Rochus, Arheoskanzen Modrá, Eventcentrum Staré Město, Klub kultury Uherské Hradiště, Velegradsky dom).

  5. INICIACIJA OSNOVANJA PODOBNOGO SOBYTJA TAKOŽE V DRUGYH SLOVJANSKYH DRŽAVAH
    Uspěh jestvujučej prědhodnoj soraboty i zainteresovanje važnyh institucij tvori osnovu vozniknenja podobnyh sobytij takože v drugyh slovjanskyh državah. Mnoge iz njih uže imajut podobne sobytja k Dnju slovjanskoj kultury i obrazovanosti, no boljšest iz njih ne imaje vidimy harakter festivala i koncentruje se na prezentaciju svojej narodnoj kultury.

  6. KULTURNY MOST MEDŽU JUŽNYMI I SĚVERNYMI SLOVJANSKYMI NARODAMI
    Dramaturgija festivala osnovana jest na prezentaciji različnyh kulturnyh tradicij sěvernyh i južnyh slovjanskyh narodov. Vsako lěto prezentuje vsegda jednogo zastupnika sěvernyh Slovjanov i južnyh Slovjanov (Makedonija i Rusini, Slovakija i Slovenija, Poljska i Hrvatija, Srbija i Lužica …) vsaky god tako tvori važny evropsky kulturny most po mottu: „jedinaki v različnosti“ medžu tutymi dvoma različnymi slovjanskymi regionami.

fotografije i video

Vse fotografije i videa sut na serveru Flickr: http://goo.gl/hwrPkn.


Rukovodstvo konferencije i činovniki Južnomoravskogo regijona v ratuši grada Hodonín

Pozdrav od medžunarodnoj organizacije Forum slovjanskyh kultur, Ljubljana, Slovenija

Pozdrav od Instituta jezykověděnja L. N. Tolstogo, Moskva, Rossija

Ceremonijalno posadženje drěva Picea Omorica v gradu Hodonín,
dar Republiky Srbija na pamět 100 lět ČSR

Velikomoravsky hram sv. Margity iz 9-ogo stolětja, Kopčany, Slovakija

Otvojenje konferencije slovjanskoju molitvoju

Otvorjenje vystavky Miroslavova evangelije v Muzeju Biblije Velehrad,
dar družstva Matica Srbska

Prezentacija medžunarodnogo projekta Ambasada slovjanskoj mladeži

Prezentacija projekta iz Trakijskogo univerziteta, Bulgarija

Prezentacija jezyka Guosa

Projekt Slavic Union International

Prezentacija na temu bogi staryh Slovjanov

Prezentacija projekta iz Univerziteta v Zagrebu

Prezentacija o historiji srbskogo jezyka

Prědsědnik družstva Matica srbska

Prěd hramom Svetogo Duha, Staré Město

Vystavka Slědami Svetyh sedmipočetnikov

Prezentacija družstva Sveta Ljudmila

Vystavka fotografij iz Balkana

Fotografija iz sěla Hrubá Vrbka

Fotografija iz grada Hodonín

Monastir Hrubá Vrbka


Reportaž o konferenciji - Guosa TV


Reportaž o konferenciji - Ambasada slovjanskoj mladeži


TV reportaž o medžuslovjanskom jezyku, konferenciji i festivalu (češsky)


Vojtěch Merunka i Roberto Lombino govoret o filmu Kolorovana ptica

Orden Konstantina Filosofa za vklad do slovjanskoj kultury